
ريحة البلاد
تفكرتها، موش هكّا؟

الباب الأزرق
قدّاش من تصويرة عندك قدّام الباب هذا؟ حتى الباب ولى يعرفك بالاسم.

بمبالوني
السكّر سخون ويحرقلك صوابعك. تاكلو وانت طالع الصعدة، وعمرك ما تستنّاه يبرد.

تاي بالبندق
الكاس سخون ما تنجمش تشدّو، أما تشرب فيه عادي. أول رشفة تحرقلك لسانك، والثانية باش تتأكّد.

الشكبّة
أربعة صحاب عندهم ثلاثين سنة يلعبو على نفس الطاولة. اللي يخسر يخلّص القهاوي.

الراديو
صليحة تغنّي في راديو أقدم من بوك، ومن الكوجينة تسمع شكون يغنّي معاها وديما يغلّط في نفس الكلمة.

الكانون
مامتك قاعدة قدّام الكانون والبرّاد الأزرق فوقو، وتعرف التاي طاب من صوتو.

العولة
في أوت السطح يولّي أحمر بالفلفل وأصفر بالكسكسي على الملاحف. يقولو للصغار ما تمشيوش غادي. يمشيو غادي.

هريسة
التيوب الأصفر في باب كل فريجيدار، ملفوف من اللوطة. كان الماكلة ما تحرحركش شوية، يقولولك: شبيك؟ مريض؟

كسكسي نهار الأحد
صحن كسكسي في الوسط والعايلة الكل دايرة بيه. أحسن طرف لحم تلقاه قدّامك، وحدّ ما يقول شكون حطّهولك.

عصيدة زقوقو
في المولد، كل دار تطيّبها وكل دار تبعث صحفة للجيران. تذوق سبعة في نهار، وتقول لأمّك اللي متاعها هي الأبنّ.
كلام البلاد
كلمات ما تحلاش كان غادي
- عسلامةAslemaأهلا. أوّل كلمة في المطار، وهي اللي تخلّيك تصدّق اللي وصلت.
- يعيّشكYaishekشكرا. mot à mot: ربّي يطوّل في عمرك.
- برشاBarshaياسر. كيما: توحّشتك برشا.
- باهيBehiمليح، ماشي، أوكي. تقولها ثلاثة مرّات باش تسكّر التليفون.
- صحّةSahaالصحّة ليك. للماكلة، للحجامة، للدوش.
- يزّيYezziبركا. تقولهالك أمّك، وتسمعها حتى من آخر الدار.
- بنينBninطيّب برشا. الـavis الوحيد اللي يهمّ.
- لاباسLabesشنوّة أحوالك؟ وهي زادة الجواب.
- توحّشتكTwahachtekتوحّشتك. والصفحة هاذي الكل على خاطرها.

البحر
تاكل الدلّاع والقلوب، والرمل داخل في كل شي. تعوم حتى تزرق شفايفك، وتقول ما نيش بردان.

التي جي آم
التران الصغير متاع البحر. البيبان محلولة والريح يضرب في وجهك، وانت تعرفهم par cœur: حلق الوادي، قرطاج، سيدي بوسعيد، المرسى.

اللواج
ما يخرجش حتى يتعبّى. تقعد مع سبعة ما تعرفهمش، الراديو يخدم، والشيفور ديما يعرف ثنية أقصر.

الحومة
زوز حجرات هما الڨول. اللعب ياقف كي تعدّي كرهبة، ووقت الأذان، وكي أمّ تطلّ من الشباك وتعيّط لولدها.

لبلابي
في الشتاء، في نصّ الليل، يجيك صحن لبلابي يحرق. تفتّت الخبز بيدك، والراجل يزيد الهريسة مغير ما يسألك.

المدفع
الطاولة حاضرة وحدّ ما يمسّها. يضرب المدفع، يأذّن الجامع، وتاكل أوّل دقلة. والبريك فيسع يوفى.

جوّ رمضان
بعد الفطور البلاد الكلّ تخرج. تشري زلابية مازالت سخونة، القهاوي معبّية، والصغار فايقين لنصّ الليل. ومبعد، يتعدّى البوطبيلة بطبلو تحت الشبّاك.


المزود
يبدا المزود، وفيسع الناس الكلّ تقوم تشطح. عمّك، اللي ما يشطحش، يشطح.

الحنّة
شمع وياسمين، وغنايات يعرفوهم النسا الكلّ. وأمّ العروسة تبكي وتضحك en même temps.

العيد
تلبس حوايج جدد يحكّو شوية، وتبوّس عمّاتك وخالاتك الكل. وكل وحدة تعطيك المهبة، وانت تحسبها مرّتين.

جدّي
جدّك قاعد في القهوة، المشموم في وذنو وقهوتو تاخو ساعة. كي يشوفك يقلّك: مرحبا بيك يا وليدي.

الفاليجة
قلت ما ثمّاش بلاصة. وتعبّات زادة: هريسة، زيت، دقلة، مقروض. الفاليجة فيها عشرين كيلو، وأمّك مازالت تسألك كليت ولا لا.

الماء
تصبّ الماء ورا الكرهبة، باش ترجع. تقعد في الباب حتى تفرغ الزنقة. ما تتلفّتش، تعرف علاش.

الطيّارة
الطيّارة ديكولات وتونس ماشية وتبعد. المشموم اللي في جيبك ذبل، أما باش تخبّيه سنة كاملة.

الباب محلول
ديما محلول. توحّشناك.
الغنايات متاع الصفحة هاذي
- Taht El Yasmina Fi EllilHedi Jouiniتحت الياسمينة في الليل
- El KahwajiMohamed Jamoussiالقهواجي
- Frag GhzaliSalihaفراق غزالي
- Lamouni Elli Gharou MenniHedi Jouiniلاموني اللي غاروا مني
- Halk El WedLotfi Bouchnakحلق الواد
- Ya LiliBalti feat. Hamoudaيا ليلي
- Baba AbdallahHedi Habboubaبابا عبد الله
- Lila Wel Mezoued KhaddemHedi Habboubaليلة والمزود خدّام
- Ya HasraBaltiيا حسرة
- Ya Msafer Khalli TodhkarOulayaيا مسافر خلي تذكار
- Sidi MansourCheikh Mohamed Boudayaسيدي منصور
- Rihet LebledMohamed Jamoussiريحة البلاد
الرسومات جوست للـpage هاذي. الغنايات والجينيريكات من يوتيوب، والحقوق لأصحابهم.