ريحة البلاد
للناس اللي خرجوا من البلاد، والبلاد ما خرجتش منهم.
الباب الأزرق
الباب هذا تعرفو. كل صيف تتصوّر قدّامو، وكل عام تكبر شوية.
بمبالوني
السكّر سخون ويحرقلك صوابعك. تاكلو وانت طالع الطلعة، وعمرك ما تستنّاه يبرد.
تاي بالبندق
حتى حدّ هوني ما هو مزروب. الكاس سخون ما يتشدّش، وتشدّو زادة.
الشكبّة
أربعة رجال على نفس الطاولة من ثلاثين عام. اللي يخسر يخلّص القهاوي ويطلب طرح أخرى.
الراديو
صليحة تغنّي من راديو قديم أقدم من بوك. وفمّا شكون في الكوجينة يغنّي معاها ويغلّط في نفس الكلمة كل مرّة.
الكانون
الكانون شاعل، البرّاد الأزرق فوقو، ومامتك تعرف التاي طاب من صوتو.
العولة
في أوت السطح يولّي أحمر بالفلفل وأصفر بالكسكسي على الملاحف. يقولو للصغار ما تمشيوش غادي. يمشيو غادي.
هريسة
التيوب الأصفر في باب كل فريجيدار، ملفوف من اللوطة. كان الماكلة ما تحرحركش شوية، تلقى شكون يسألك انت مريض؟
كسكسي نهار الأحد
صحن واحد والمغارف الكل فيه. أحسن طرف لحم يجي لجهتك بالشويّة، وما حدّ يقول شكون حطّهولك.
عصيدة زقوقو
في المولد، كل دار تطيّبها وكل دار تبعث صحفة للجيران. تذوق سبعة في نهار، وتقول لأمّك اللي متاعها هي الأبنّ.
كلام البلاد
كلمات ما تحلاش كان غادي
- عسلامةAslemaأهلا. أوّل كلمة في المطار، وهي اللي تخلّيك تصدّق اللي وصلت.
- يعيّشكYaishekشكرا. mot à mot: ربّي يطوّل في عمرك.
- برشاBarshaياسر. كيما: توحّشتك برشا.
- باهيBehiمليح، ماشي، أوكي. تقولها ثلاثة مرّات باش تسكّر التليفون.
- صحّةSahaالصحّة ليك. للماكلة، للحجامة، للدوش.
- يزّيYezziبركا. تقولها الأمّهات، وتسمعها حتى من آخر الدار.
- بنينBninطيّب برشا. الـavis الوحيد اللي يهمّ.
- لاباسLabesشنوّة أحوالك؟ وهي زادة الجواب.
- توحّشتكTwahachtekتوحّشتك. والصفحة هاذي الكل على خاطرها.
البحر
دلّاع، قلوب، والرمل في كل شي. تعوم حتى تزرق شفايفك، وتقول ما نيش بردان.
التي جي آم
التران الصغير متاع البحر. البيبان محلولة، الريح داخل، وانت تعرف الـstations par cœur: حلق الوادي، قرطاج، سيدي بوسعيد، المرسى.
اللواج
ما يخرجش حتى يتعبّى. ثمانية ما يعرفوش بعضهم، راديو واحد، وشيفور يعرف ثنية أقصر.
الحومة
زوز حجرات هما الڨول. اللعب ياقف كي تعدّي كرهبة، ووقت الأذان، وكي أمّ تطلّ من الشباك وتعيّط لولدها.
لبلابي
في الشتاء، نصّ الليل، صحن لبلابي يحرق. تفتّت الخبز بيدك، والراجل يزيد الهريسة مغير ما يسألك.
المدفع
الطاولة حاضرة وحدّ ما يمسّها. ومبعد المدفع، الأذان، وأوّل دقلة. والبريك فيسع يوفى.
جوّ رمضان
بعد الفطور البلاد الكلّ تخرج. زلابية مازالت سخونة، قهوة ما فيهاش كرسي فارغ، صغار فايقين في نصّ الليل. ومبعد، البوطبيلة وطبلو يتعدّاو تحت الشبّاك.
المزود
يبدا المزود، وفيسع الناس الكلّ تقوم تشطح. عمّك، اللي ما يشطحش، يشطح.
الحنّة
شمع، ياسمين، وغنايات يعرفوهم النساء الكلّ. وأمّ العروسة تبكي وتضحك en même temps.
العيد
حوايج جدد يحكّو شوية، وتبوّس عمّاتك وخالاتك الكل. وكل وحدة تعطيك المهبة، وتحسبها مرّتين.
جدّي
ياسمينة في الوذن وقهوة يقعد عليها ساعة. وقبل ما تحطّ صاكك يسألك وقتاش ترجع.
الفاليجة
قلت ما ثمّاش بلاصة. وتعبّات زادة: هريسة، زيت، دقلة، مقروض. الفاليجة فيها عشرين كيلو، وأمّك مازالت تسألك كليت ولا لا.
الماء
تصبّ الماء ورا الكرهبة، باش ترجع. تقعد في الباب حتى تفرغ الزنقة. ما تتلفّتش، تعرف علاش.
الطيّارة
الطيّارة ديكولات وتونس ولّات بعيدة. المشموم اللي في جيبك ذبل، أما باش تخبّيه عام كامل.
الباب محلول
ديما محلول. توحّشناك. توحّشناك
الغنايات متاع الصفحة هاذي
- Taht El Yasmina Fi EllilHedi Jouiniتحت الياسمينة في الليل
- El KahwajiMohamed Jamoussiالقهواجي
- Frag GhzaliSalihaفراق غزالي
- Lamouni Elli Gharou MenniHedi Jouiniلاموني اللي غاروا مني
- Halk El WedLotfi Bouchnakحلق الواد
- Ya LiliBalti feat. Hamoudaيا ليلي
- Baba AbdallahHedi Habboubaبابا عبد الله
- Lila Wel Mezoued KhaddemHedi Habboubaليلة والمزود خدّام
- Ya HasraBaltiيا حسرة
- Ya Msafer Khalli TodhkarOulayaيا مسافر خلي تذكار
- Sidi MansourCheikh Mohamed Boudayaسيدي منصور
- Rihet LebledMohamed Jamoussiريحة البلاد
الرسومات مرسومين جوست للـpage هاذي. الغنايات والجينيريكات من يوتيوب، والحقوق لأصحابهم.